રાધાનો પ્રેમ
કો'ક દિ એણે વિહ્વળ થઇ શોધ્યું હશે,
રાધા, તારી પ્રીતની બાંસુરી નું ગાન!
બંસી બજૈયાએ છેડેલા સૂરે દૂરતામાં
એને પજવીને, ભૂલાવ્યું હશે ભાન!
પ્રેમનો પમરાટ થયો હશે કદંબને ડાળ
જેમ રાધા ઝૂરતી લેતી'તી કાના નું નામ
યુદ્ધના શંખ ન થંભ્યાં ત્યાં સુણવા રાવ
રાધાગૌરી કેમ ઝીલ્યાં તમે આકરા ઘાવ?
રાધાજી બોલે, કહું શ્વાસે શ્વાસે સર્જન એનું
રહે છે દિલમાં ને વહે તનમાં, કાના, તું ને તું!
વિરહમાં પણ નથી લાગ્યું આપણું ગઠન ઢીલું
જીવતે જ્યોતિ ભળી મારી તું થી,ન કંઈ બીજું
અહીં આંખ રડે તો જાણું કાનાજીનું હૈયું વીલું
બંસી ત્યજી એણે કે સૂર લાવે આંખમાં આંસુ
હશે કા'ના દૂરતા, ન શ્વાસ અનુભવે જુદાપણું
કર્મયોગેશ્વર તું, મારો કા'નો, જ્યાંં હો મારો તું!
©અર્ચિતા દીપક પંડ્યા
