Stri

સૌન્દર્યા છું , સ્ત્રી છું .
પુરુષની જોડ પ્રકૃતિ છું .
મમતાની એક આવૃત્તિ છું
જનનીની જાગતી વૃત્તિ છું .
પ્રિયા છું , પ્રેમે પરવશ છું ,
પ્રયોગે પ્રસરતી પ્રવૃત્તિ છું .
પ્રીતે પ્રિય ભાષીની છું ,
પ્રથા એ પ્રિયદર્શીની છું .
સ્વરૂપે સુહાગીની છું .
ભાવથી ભગિની છું ,
અનેક રૂપે રંજીત છું ,
વલણથી સદા મનજિત છું .
રૂપથી ગજગામિની છું
મનથી માનુની છું .
અંતરથી આર્દ્ર છું ,
પણ નીતિ હોય તો નેતા છું .
સંસ્કારે ગર્વિષ્ઠા છું ,
કર્તુત્વે ધર્મિષ્ઠા છું ,
સંસારે અધિષ્ઠા છું ,
તેજ કહો તો શર્મિષ્ઠા છું .
અંધારે દીપ્તિ છું ,
વિકટે સ્વયંસિદ્ધા છું.
હર એક કૃષ્ણ ની હર એક રાધા છું ,
રૂપ અને ગુણ સાથે પ્રેમ સરિતા  છું .
ઈશ્વર ઝંખે એવી  કૂખ છું  ,
પામું અને વહેચું એવું સુખ છું  .
     અર્ચિતા દીપક પંડ્યા .

Radha

રાધા , તારો જબરો ઈજારો થઇ ગયો પ્રેમ પર !
કદી હક્ક ના માંગ્યો તે,એ જ સવાઈ પણ ઉપર !
અંતર ઉલેચાય,કનડગત થાય તો ય જીવે પ્રેમ પર
વાટ જોતા શરીર ગળે પણ નજર તો પગદંડી ઉપર
વાલમજી ખેડ્યા કરે ખેપ પણ તું તો એ ધરતી પર
જાણે શ્વાસ કૃષ્ણના બંસીમાં,ને તું જીવે તેની ઉપર !
'કૃષ્ણ' નું  રટણ જાગે કાયમ ગોકુલની મોસમ પર
જીવ તારો તો જાણે રહ્યો એક કદંબ ડાળ ની ઉપર
અમથો નથી લીધો, રાધા ,ભાર તે તારા જીવ પર !
તારા નામ વિના પુષ્પ પણ ન ચડે કૃષ્ણ-છબી પર !
                           અર્ચિતા દીપક પંડ્યા

Poem::sagvad

દિલ રૂપાળો ઓરડો ખોળે છે
ગોળ દુનિયામાં ખૂણો ખોળે છે
સહુ પોતાની સગવડ ઝંખે છે
આકરી દુનિયામાં હૂંફ ખોળે છે
ક્યાંક પ્રેમની પરબ પાંગરે છે
કટુતા કાપી સ્નેહને ખોળે છે
ઉડાનની મંઝીલ એક મળે છે
મહેનત જ તેનો મારગ ખોળે છે
સહુ સહુની રીત સાચવે છે
જીવનનો રસ્તો સૌ ખોળે છે
પ્રસંગો જાણે કે શીખ બને છે
અનુભવ એ જ નવિન ખોળે છે
સ્મરણ પણ આયનો બને છે
ઝાંઝવામાં પણ પૂર ખોળે છે 
કકરી ધરામાં કોઈ ખાસ લાગે છે
કોઈ તો સાથ સુંવાળી શોધે છે....
             અર્ચિતા દીપક પંડ્યા

virat purush 1

સુંદર છે
અંશ સત્યનો છે
ભાવ શિવનો છે
પ્રાણ પ્રકૃતિનો છે
.....પુરુષ છે એ .....
ઇશનો ગર્ભ છે
શાશ્વત વંશ છે
અનાદી પ્રવાલ છે
નિરંતર જ્વાલ છે
શ્રેયમાં પ્રેય લાગે
પ્રેય માં શ્રેય સાધે
અધિકારે નીર્દંશ છે
પરિવારે પૂર્ણ નિયોગ છે
પુંજી એ યોગ છે
પ્રેમે સંતુલિત આવેગ છે
પિતૃત્વ હોય તો પ્રેમ પ્રધાન છે
સ્વસ્થતાનું સંધાન છે
પ્રાપ્તિ વિષે અંતર્ધાન છે
હક્ક કહો તો અવધાન છે
જીવન માટે સુકાન છે
વિચારોમાં કલ્યાણ છે
ભવિષ્ય માટે એંધાણ છે
કુટુંબ આવે તો ન્યોછાવર છે
સ્નેહનું સરોવર છે
એકમ પરિવારનો છે
પ્રેમ પરસ્પર આપે છે
સ્ત્રીને સર્વસ્વ લાગે છે
પીતૃરૂપે પરબ્રહ્મ ભાસે છે
ગતિએ પુરુષોત્તમ છે
હરીહરનું પરિસર છે
ઈચ્છામાં શ્રેય લાવે છે
જગતમાં શ્રેષ્ઠ જ સાધે છે
વિરાટ પુરુષ છે એ ......
    અર્ચિતા દીપક પંડ્યા